የሩሲያ እና አፍሪካ ግንኙነት፡ በኢኮኖሚ እና በወታደራዊ ዘርፍ ያለው ተጽዕኖ

ሩሲያ ከአፍሪካ አገራት ጋር ያላትን የዲፕሎማሲ፣ የኢኮኖሚ እና የወታደራዊ ግንኙነት ለማጠናከር እየሰራች ትገኛለች። ፕሬዝደንት ቭላድሚር ፑቲን አፍሪካን የሩሲያ ተፈጥሯዊ አጋር አድርገው የገለጿት ሲሆን፣ የሁለቱ ወገኖች ግንኙነት ባለብዙ ዋልታ የሆነ የዓለም ሥርዓትን ለመገንባት እንደሚያግዝ አስረድተዋል። ይሁንና መረጃዎች እንደሚያሳዩት ከኢኮኖሚ አንጻር የሩሲያ ከአፍሪካ ጋር ያላት የንግድ ልውውጥ እንደ ቻይና፣ አውሮፓ ኅብረት እና አሜሪካ ካሉ አገራት ጋር ሲነጻጸር አነስተኛ ነው። ግብጽ ብቻዋን የሩሲያ የንግድ ልውውጥ ውስጥ ከፍተኛ ድርሻ ያላት ሲሆን፣ የሁለቱ አገራት ንግድ በዋናነት በምግብ፣ በብረታ ብረት እና በኑክሌር ኢነርጂ ፕሮጀክቶች የተሳሰረ ነው። በሌላ በኩል ሩሲያ በአፍሪካ ያላት ተጽዕኖ በኢኮኖሚ ከማደግ ይልቅ በወታደራዊ እና በጸጥታ ዘርፎች የበለጠ ጎልቶ ይታያል። የቀድሞው ቫግነር ቡድን ተተኪ የሆነው “አፍሪካ ኮርፕስ” በበርካታ የአፍሪካ አገራት የሚንቀሳቀስ ሲሆን፣ ሩሲያም አሁንም ለብዙ የአፍሪካ አገራት የጦር መሣሪያ አቅራቢ ዋና አገር ነች።