Godina Wag Hemra keessatti sababa rooba dhabuutiin duuti mudachaa jira

Godina Wag Hemra naannoo Amaaraatti rooba dhabuun (dalluun) mudate lubbuu namootaa galaafachaa jiraachuu gabaasameera. Jiraattoonni aanaalee Sahala Seyem fi Tsagimji akka jedhanitti, hanqina midhaanii fi nyaata beeyiladaatiin walqabatee namoonni du'aa jiru; keessattuu ijoolleen fi maanguddoon miidhamaa jiru. Waajjirri qonnaa aanaa ibsuun, namoonni 66,000 ol ta'an rakkichaan miidhamuu fi mootummaan deeggarsa nyaataas gahaa akka hin taane dubbataniiru.

Komishiniin ittisa balaa naannoo Amaaraa, aanaalee shanan keessatti midhaan kuntaala 11,000 ol raabsamaa jiraachuu beeksiseera. Kunis dhiibbaa El-Niinoon mudateen miidhamtootaaf kan gargaaru dha. Haata'u malee, tursiinsii geejjibaa fi hanqinni gargaarsaa rakkoo jiru ulfeessuu isaa himameera. Jiraattoonni walitti bu'iinsa duraanii fi rooba dhabuu kanaan walqabatee gargaarsi ariifachiisaa mootummaa fi dhaabbilee gargaarsa namoomaa barbaachisuu ibsaniiru.