ኣብ ሴኔጋል 142 ስደተኛታት ተታሒዞም፤ ኣብ ደሴታት ካናሪ ህጹጽ እዋን ተኣዊጁ

ኣብ ሴኔጋል ዝርከቡ ሰበ ስልጣን ዓርቢ ናብ ስጳኛ ንምኻድ ዝፈተኑ 142 ስደተኛታት ኣብ ትሕቲ ቁጽጽር ኣውዒሎም። በቲ ካልእ ወገን ድማ፡ ኣብ ደሴታት ካናሪ ዝርከብ ምምሕዳር ደሴት ኤል ሂይሮ፡ ናብታ ደሴት ዝኣትዉ ስደተኛታት ብምውሳኹ ህጹጽ እዋን ኣዊጁ። ኣብዚ ወርሒ እዚ ጥራይ ብ30 ጃላቡ ልዕሊ 3,300 ስደተኛታት ናብታ ደሴት ከምዝበጽሑ ተገሊጹ። መገዲ ውቅያኖስ ኣትላንቲክ ንስደተኛታት ኣዝዩ ሓደገኛ ምዃኑ ዝፍለጥ ኮይኑ፡ ኣብ ዝሓለፉ ዓመታት ሽሕታት ህይወቶም ስኢኖም እዮም። ብ2024 ናብታ ደሴት ዝኣተዉ ስደተኛታት 46,000 በጺሑ እኳ እንተነበረ፡ ብሰንኪ ስራሕቲ ቁጽጽር ግና ቁጽሮም ቀኒሱ ምንባሩ ተሓቢሩ።