Mummichi Ministeeraa Abiy pirojektii bishaan obaatii fi dhiyeessii bishaanii Megech eebbisan

Mummichi Ministeeraa Abiy Ahimad pirojektii misooma jallisii fi dhiyeessii bishaanii Megech naannoo Amaaraa, godina Gondar Kaabaatti argamu eebbisuun bananiiru. Pirojektichi qabeenya bishaanii miliyoona 185 kiyuubik meetirii qabachuu danda'u yoo ta'u, lafa hektaara 17,000 ol ta'u jallisiidhaan misoomsuun qonnaan bultoota kumaatamaatti fayyadamaa akka taasisu eegama. Kana malees, magaalota Gondar fi naannoosaaf dhiyeessii bishaanii qulqulluun akka ta'u ibsameera. Mummichi Ministeeraa haasaa taasisaniin, pirojektichi waggaa 19 guutuuf turuunsaa rakkoo gurmaa'insa mootummaa kan agarsiisu ta'uu eeranii, rakkoolee akkasii hiikuuf kontraktara jijjiiruu fi adeemsa hojii fooyyessuun barbaachisaa akka ta'e ibsaniiru. Misooma biyyoolessaa itti fufsiisuuf dandeettii dhaabbilee fi namoota biyya keessaa cimsuun akkasumas qindoomina mootummaa federaalaa fi naannoo jiru jabeesuun murteessaa ta'uu gorsa kennaniiru. Dhumarrattis, pirojektileen kun qabeenya uummataatii waan ta'eef jiraattonni eeggumsa akka godhaniif gaafataniiru.