ቀዳማይ ሚኒስትር አቢይ ንፕሮጀክት መስኖን ማቅረቢን ማይን መገች ኣመሪቖም

ቀዳማይ ሚኒስትር ኣቢይ ኣሕመድ ኣብ ክልል ኣምሓራ ሰሜን ጎንደር ዞባ ዝተሃነጸ ፕሮጀክት መስኖን ኣቕረቢ ማይን መገች ኣመሪቖም ከፊቶም። እቲ ፕሮጀክት 185 ሚልዮን ኩቢክ ሜተር ናይ ምሓዝ ዓቕሚ ዘለዎ ኮይኑ፣ ልዕሊ 17 ሺሕ ሄክታር መሬት ብምልማዕ ንሽሕታት ሓረስቶት ተጠቃሚ ከምዝገብር ይግለጽ። ብተወሳኺ ንከተማ ጎንደርን ከባቢኣን ጸገም ኣቕረቢ ማይ ንምፍታሕ ክሕግዝ እዩ። እቶም ቀዳማይ ሚኒስትር ኣብቲ ስነ-ስርዓት ኣብ ዘስምዕዎ መደረ፣ እቲ ፕሮጀክት ን19 ዓመታት ተጓቲቱ ከምዝጸንሐ ብምሕባር፣ እዚ ድማ ብሰንኪ ስትራክቸራዊ ድኽመት ምዃኑ ገሊጾም። ነዚ ጸገም ንምፍታሕ ድማ ኮንትራክተር ምቕያር ከምዘድለየ ኣገንዚቦም። ሃገራዊ ልምዓት ዘላቒ ንምግባር ናይ ውሽጢ ዓዲ ዓቕሚ ምህናጽን ኣብ መንጎ ፌዴራልን ክልልን ዘሎ ምትሕብባር ወሳኒ ምዃኑ ኣዘኻኺሮም። ኣብ መወዳእታ ድማ እዞም ፕሮጀክታት ናይ ህዝቢ ስለዝኾኑ ነበርቲ ክሕልውዎም ጸዊዖም።