የጋናው የቀድሞ ፕሬዝዳንት የመገች ግድብን ጎበኙ

የጋና የቀድሞ ፕሬዝዳንት ጆን ማሃማ በጎንደር የሚገኘውን የመገች የመስኖ ልማት ፕሮጀክት ጎብኝተዋል። ፕሬዝዳንቱ ፕሮጀክቱ ለምግብ ዋስትና እና ለኢኮኖሚ እድገት ያለውን ፋይዳ በመጥቀስ ኢትዮጵያ ለረጅም ጊዜ የቆዩ ፕሮጀክቶችን በማጠናቀቅ ላይ የምታሳየው ቁርጠኝነት ለአፍሪካ መሪዎች አርዓያ ነው ብለዋል። ማሃማ በኢትዮጵያ ያዩት ለውጥ በጋና ተመሳሳይ የተተዉ ፕሮጀክቶችን እንደገና ለመጀመር መነሳሳት እንደፈጠረላቸው ገልጸዋል። የ19 ዓመታት እድሜ ያለው የመገች ግድብ፣ ጠቅላይ ሚኒስትር አቢይ አህመድ ከሶስት ዓመት በፊት ባደረጉት ጥረት መጠናቀቁ ተገልጿል። ግድቡ 185 ሚሊዮን ኪዩቢክ ሜትር የመያዝ አቅም ያለው ሲሆን ከ17 ሺህ ሄክታር በላይ መሬት በማልማት ለጎንደር ከተማ እና አካባቢዋ ነዋሪዎች የመጠጥ ውሃ እንደሚያቀርብ ተጠቁሟል።