የቀይ ባህር ተደራሽነት ለኢትዮጵያ ህልውና ወሳኝ መሆኑን አምባሳደር ዘሪሁን ገለጹ

በባህር ዳር እየተካሄደ ባለው 12ኛው የጣና ከፍተኛ የደህንነት መድረክ ላይ ንግግር ያደረጉት አምባሳደር ዘሪሁን፣ ለኢትዮጵያ የባህር ተደራሽነት ጉዳይ የህልውና ጥያቄ መሆኑን ገለጹ። አምባሳደሩ ኢትዮጵያ በጂኦግራፊያዊ አቀማመጧ እና በደህንነት ፍላጎቷ ምክንያት በቀይ ባህር ጉዳዮች ላይ በውይይት መካተት እንዳለባት አጽንኦት ሰጥተዋል። በውይይቱ ላይ የብሄራዊ መረጃና ደህንነት አገልግሎት ዋና ዳይሬክተር አምባሳደር ረድዋን ሁሴን፣ ቀይ ባህር ለኢትዮጵያ የንግድ እንቅስቃሴ ወሳኝ መሆኑን ጠቁመው፣ በአካባቢው እየጨመረ የመጣው ወታደራዊ እንቅስቃሴና በንግድ መርከቦች ላይ የሚፈጸሙ ጥቃቶች የጋራ ስጋት መሆናቸውን አስታውቀዋል። የዘንድሮው የጣና መድረክ በአፍሪካ ቀንድና በቀይ ባህር ወቅታዊ የደህንነትና የጂኦፖለቲካዊ ለውጦች ላይ በማተኮር እየተካሄደ ነው።