የቀድሞው የአፍሪካ ህብረት ኮሚሽን ሊቀመንበር ኢትዮጵያ ለሌሎች አፍሪካውያን ሀገራት አርአያ መሆኗን ገለጹ

የቀድሞው የአፍሪካ ህብረት ኮሚሽን ሊቀመንበር ንኮሳዛና ድላሚኒ-ዙማ ኢትዮጵያ በሀገር በቀል ልማት እና በኃይል ፖሊሲዎቿ ለሌሎች የአፍሪካ ሀገራት አርአያ መሆኗን ገልጸዋል። በሩሲያ-አፍሪካ ጉባኤ ዋዜማ ከኢዜአ ጋር ባደረጉት ቃለ ምልልስ፣ ታላቁ የኢትዮጵያ ህዳሴ ግድብ የውጭ እርዳታ ሳይጠብቁ በራስ አቅም የመገንባት ትልቅ ምልክት መሆኑን ተናግረዋል። በተጨማሪም ኢትዮጵያ የነዳጅ ተሽከርካሪዎችን ወደ ሀገር ውስጥ እንዳይገቡ የወሰደችው እርምጃ፣ በአረንጓዴ የኢነርጂ ሽግግር ረገድ አህጉራዊ ግንባር ቀደም ተጠቃሽ መሆኗን አስረድተዋል። እንደ እሳቸው ገለጻ፣ አፍሪካውያን በራሳቸው የመተማመን አቅም ሲኖራቸው ብቻ ነው ትልቅ ስኬት ማስመዝገብ የሚችሉት። አዲስ አበባን በቅርቡ እንደጎበኙ የጠቀሱት ድላሚኒ-ዙማ፣ በከተማዋ እየታየ ያለው ፈጣን ለውጥ የኃይል አቅርቦት ስኬት ማሳያ ነው ብለዋል።