ኢትዮጵያ በአፍሪካ የጤና ምርቶች ማምረቻ ማዕከል እየሆነች ነው ተባለ

በአዲስ አበባ በተካሄደው የአፍሪካ የጤና አጠባበቅ ምርቶች ማምረቻ ኮንፈረንስ (AHMTEC 2026) ላይ የተገኙት ባለሙያው ዶክተር ባርተን፣ ኢትዮጵያ በጤና ምርቶች ማምረቻ ዘርፍ በአፍሪካ ቀዳሚ እየሆነች መሆኗን ገለጹ። ባለሙያው እንዳሉት፣ በኢትዮጵያ በቅርብ ዓመታት የተደረጉት የኢኮኖሚ፣ የውጭ ምንዛሪ እና የባለቤትነት ፖሊሲ ማሻሻያዎች ለኢንቨስተሮች ትልቅ ዕድል ፈጥረዋል። ኢትዮጵያ ቀደም ሲል በነበሩ የገበያ ክልከላዎች አስቸጋሪ የነበረች ቢሆንም፣ አሁን ግን ትልቅ አቅም ያለው ገበያ ሆናለች ብለዋል። አፍሪካ የራሷን የህክምና ምርቶችና ክትባቶች ማምረት እንዳለባት ያነሱት ዶክተሩ፣ የኢትዮጵያ ትልቅ የህዝብ ቁጥር እና የኢኮኖሚ አቅም ለውጭ ኩባንያዎች ወሳኝ መዳረሻ እንደሚያደርጋት ገልጸዋል። መንግስት በዩኒቨርሲቲዎችና በምርምር ዘርፍ ኢንቨስትመንቱን እንዲያጠናክርም ጥሪ አቅርበዋል።