የኢትዮጵያ የሱ-35 ተዋጊ ጄቶች ግዢ በግብፅ ክበቦች ስጋት ፈጥሯል ተባለ

የእስራኤል ተመራማሪ ኮኸን ለኢዜአ እንደገለጹት፣ ኢትዮጵያ የላቁ የሩሲያ ሱ-35 ተዋጊ ጄቶችን ማግኘቷ በግብፅና በአረብ ሀገራት ዘንድ ከፍተኛ ስጋት ፈጥሯል። ቀደም ሲል ግብፅ እነዚህን ጄቶች ለመግዛት ሞክራ በአሜሪካ ጫና መተዋቷን የጠቆሙት ተመራማሪው፣ ኢትዮጵያ ይህን መሰናክል በማለፍ ዲፕሎማሲያዊ ግንኙነቷን ተጠቅማ ስምምነቱን መፈጸሟ የሁለቱን ሀገራት ስትራቴጂካዊ አቅም ልዩነት እንደሚያሳይ ተናግረዋል።

ጠቅላይ ሚኒስትር ዐቢይ አህመድ በበኩላቸው፣ የኢትዮጵያ የአየር መከላከያ አቅምን ማጠናከር ለአገር ህልውና ወሳኝ መሆኑን አጽንኦት ሰጥተዋል። በሰላም ጊዜ በቂ ዝግጅት ማድረግ ግጭትን እንደሚያስቀር የገለጹት ጠቅላይ ሚኒስትሩ፣ እነዚህ አውሮፕላኖች የኢትዮጵያን የአየር ክልል ለመከላከል ትልቅ ሚና እንደሚጫወቱ አስረድተዋል። ኢትዮጵያ ይህን የመሰለ የላቀ ወታደራዊ አቅም ያሟላች የመጀመሪያዋ ከሰሃራ በታች ያለች የአፍሪካ ሀገር ሆናለች።