ኦቶና ሆስፒታል በእሳት ጉዳት ምክንያት አገልግሎቱ ተቋርጦ ታካሚዎች እየተጉላሉ ነው

ከአንድ ዓመት በፊት በደረሰ የእሳት አደጋ የተጎዳው የኦቶና ሆስፒታል እስካሁን ሳይጠገን በመቆየቱ ታካሚዎች ለከፍተኛ እንግልት እየተዳረጉ መሆናቸውን ነዋሪዎች እና የጤና ባለሙያዎች ገለጹ። በቃጠሎው ምክንያት በርካታ የምርመራ ክፍሎች ተዘግተው በመቆየታቸው ታካሚዎች ወደ ሌሎች ከተሞችና የግል ተቋማት እንዲሄዱ እየተገደዱ ነው። የጤና ባለሙያዎች እንደሚሉት ለሆስፒታሉ መልሶ ግንባታ ከፌዴራል እስከ ክልል ድጋፍ ቢደረግም፣ ግንባታው እስካሁን ሳይጀመር መቅረቱ አሳዛኝ ነው። በአሁኑ ወቅት የተቃጠለውን ሕንፃ የማጽዳት ስራዎች እየተከናወኑ ቢሆንም፣ አገልግሎቱ ሙሉ ለሙሉ አለመመለሱ የሆስፒታሉን አቅም ቀንሶታል። ቲክቫህ ኢትዮጵያ በጉዳዩ ላይ ከወላይታ ሶዶ ዩኒቨርሲቲ እና ከደቡብ ኢትዮጵያ ክልል ጤና ቢሮ ማብራሪያ ለማግኘት ያደረገው ሙከራ በአመራር ሽግሽግ ምክንያት አልተሳካም።