የአዲስ አበባ ገቢዎች ቢሮ የሂሳብ መዝገብ ለማያቀርቡ ግብር ከፋዮች ቅጣት መጣል ጀመረ

የአዲስ አበባ ከተማ አስተዳደር ገቢዎች ቢሮ የሂሳብ መዝገብና መግለጫ የማቅረብ ግዴታቸውን ለሚጥሱ ግብር ከፋዮች አስተማሪ እርምጃ እንዲወሰድ መመሪያ አስተላልፏል። ቢሮው እንዳስታወቀው የ2018 የግብር ዘመን የሂሳብ መዝገብ መያዝ ግዴታ ነው። በፌዴራል ገቢ ግብር አዋጆች መሠረት ደረጃ "ሀ" እና "ለ" ግብር ከፋዮች ገቢያቸውን በሰነድ መደገፍ አለባቸው።

ከዚህ ውጪ የሚገኙ አካላት ታክስ ለመሰወር እንደሞከሩ ይቆጠራሉ። ቅጣቱም የትርፋማነት ህዳግ በእጥፍ እንዲሰላ፣ በታክስ ጉድለት ላይ 40 በመቶ እንዲሁም በዋናው ታክስ ላይ 200 በመቶ የገንዘብ ቅጣት መጣልን ያካትታል። ተጠያቂ የሚሆኑ አካላት ዝርዝር ለህግ ተገዥነት ዘርፍ እንዲተላለፍ ተደርጓል።