የአዲስ አበባ ከተማ አስተዳደር የወተት ጥራትና ደህንነትን ለማስጠበቅ አዲስ የሕግ ማዕቀፍ አዘጋጀ

የአዲስ አበባ አርሶ አደርና ከተማ ግብርና ልማት ኮሚሽን ጥሬ ወተት ላይ የሚስተዋሉ የጤና ስጋቶችን ለመቅረፍ አዲስ የሕግ ማዕቀፍ ማዘጋጀቱን አስታውቋል። ማዕቀፉ እንደ ወተት ማጓጓዣ ዕቃዎች፣ የመኖ አያያዝ፣ የንጽህና አጠባበቅ እና የመሸጫ ሱቆች ላይ ጥብቅ ቁጥጥር የሚያደርግ ሲሆን፣ እንደ ጥሰቱ ክብደት የገንዘብ ቅጣትንና እስራትን ጭምር እንደሚያካትት ተገልጿል። ኮሚሽኑ አሁን ላይ ሱቆች የጥራት መመርመሪያ መሳሪያ እንዲኖራቸው የማድረግ ስራ እየሰራ መሆኑንና ባለሞያዎችም ስልጠና እንደወሰዱ ገልጿል። ሕጉ ገና ያልጸደቀ ቢሆንም፣ ጸድቆ ሲወጣ ከእርባታ ቦታ እስከ መሸጫ ሱቅ ያለውን ሂደት በሕግ እንደሚቆጣጠር ይጠበቃል። ወደፊትም ጥሬ ወተት ሽያጭን ሙሉ ለሙሉ በመከልከል ወደ ፓስቸራይዝድ ወተት ብቻ የመቀየር ዕቅድ ሊኖር እንደሚችል የኮሚሽኑ ም/ኮሚሽነር ዶ/ር ፀጋ ለማ ተናግረዋል።