በኢትዮጵያ የአዕምሮ ህክምና መድኃኒቶች እጥረትና የጥራት ችግር ተከሰተ

የኢትዮጵያ አዕምሮ ህክምና ማህበር ዋና ፀኃፊ ዶ/ር እንግዳ ግርማ፣ በሀገሪቱ ለአዕምሮ ህክምና አገልግሎት የሚውሉ መድኃኒቶች በቋሚነት አለመገኘት፣ የጥራት መጓደል እና የዋጋ ንረት በህክምናው ላይ ከፍተኛ ችግር እየፈጠሩ መሆኑን ገለጹ። መድኃኒቶች በድንገት ከገበያ መጥፋታቸው ህሙማን ወደ ቀድሞ የጤና እክል እንዲመለሱ እያደረገ ሲሆን፣ አንዳንድ መድኃኒቶች ደግሞ ምንም ለውጥ የማያመጡ መሆናቸው የጥራት ችግር እንዳለ አሳይቷል።

ከዚህ በተጨማሪም፣ መድኃኒቶች ረዘም ላለ ጊዜ የሚወሰዱ በመሆናቸው እየጨመረ የመጣው የዋጋ ንረት በታካሚዎችና ቤተሰቦቻቸው ላይ ከፍተኛ ኢኮኖሚ ጫና ፈጥሯል። በተለይም ለትኩረት ማጣትና ንቁነት ህመም (ADHD) የሚሰጡ መድኃኒቶች አለመኖር ታካሚዎች ወደ ስራ እና ውጤታማ ህይወት እንዳይመለሱ እያደረገ ይገኛል። ዶ/ር እንግዳ አስፈላጊ መድኃኒቶች በአስቸኳይ ወደ ሀገር ውስጥ እንዲገቡ ጥሪ አቅርበዋል።