በደቡብ ኢትዮጵያ ታጣቂዎች 5 አርሶ አደሮችን ገደሉ፤ ከ200 በላይ ከብቶች ዘረፉ

ባለፈው ሐሙስ በደቡብ ኢትዮጵያ ክልል ቡርጂ እና ኮሬ ዞኖች ከኦሮሚያ ክልል ምዕራብ ጉጂ ጋር በሚዋሰኑበት አካባቢ በተፈጸመ ጥቃት 5 አርሶ አደሮች መገደላቸውን ነዋሪዎች እና የአካባቢው የፖሊስ አመራሮች አረጋግጠዋል። ጥቃቱ የደረሰው አርሶ አደሮቹ ማሳ ላይ በጋራ የልማት ስራ ላይ እና ከብት በመጠበቅ ላይ እያሉ ከምዕራብ ጉጂ በኩል በመጡ ታጣቂዎች ነው። በከተማው ነዋሪዎች መረጃ መሰረት ከሰው ህይወት መጥፋት በተጨማሪ ከ200 በላይ ከብቶች የተዘረፉ ሲሆን፣ የቡርጂ ዞን አስተዳደር ጉዳዩን በማውገዝ ወንጀለኞችን ለህግ ለማቅረብ የምዕራብ ጉጂ አመራሮች የድርሻቸውን እንዲወጡ ጥሪ አቅርቧል። የሶያማ ወረዳ ፖሊስ ጥቃቱን አደገኛ እና ከህዝብ አቅም በላይ እንደሆነ በመግለጽ ጉዳዩን ለክልል መንግስት እያሳወቁ መሆኑን ገልጸዋል። የኦሮሚያ ክልል የምዕራብ ጉጂ ዞን አመራሮች በጉዳዩ ላይ እስካሁን ምላሽ አልሰጡም።