ኣብ ደቡብ ኢትዮጵያ ብዕጡቃት 5 ሓረስቶት ተቐቲሎም፤ ልዕሊ 200 ከብቲ ተዘሪፉ

ኣብዚ ዝሓለፈ ሓሙስ ኣብ ደቡብ ክልል ኢትዮጵያ ኣብ ዝርከባ ዞባታት ቡርጂን ኮሬን ካብ ኦሮሚያ ክልል ምዕራብ ጉጂ ምስ ዝዋሰናሉ ከባቢታት ብዝተፈጸመ መጥቃዕቲ 5 ሓረስቶት ከምዝተቐትሉ ነበርትን ሓለፍቲ ፖሊስን ኣረጋጊጾም። እቲ መጥቃዕቲ ዝተፈጸመ እቶም ሓረስቶት ኣብ ግራቶም ብሓባር ክሰርሑን ከብቲ ክሕልዉን ኣብ ዝነበርሉ እዋን ካብ ምዕራብ ጉጂ ብዝመጹ ዕጡቓት እዩ። ካብ ህይወት ሰባት ብተወሳኺ ልዕሊ 200 ከብቲ ከምዝተዘረፉን ልዕሊ 1 ሚልዮን ብር ዝግመት ንብረት ከምዝዓነወን ወይ ከምዝተዘረፈን ተገሊጹ። ምምሕዳር ዞባ ቡርጂ ነቲ መጥቃዕቲ ብምውጋዝ ሓለፍቲ ምዕራብ ጉጂ ገበኛታት ንፍትሒ ንኸቕርቡ ጻውዒት ኣቕሪቡ። ፖሊስ ወረዳ ሶያማ እቲ መጥቃዕቲ ሓደገኛን ካብ ዓቕሚ ህዝቢ ንላዕሊን ምዃኑ ብምግላጽ ጉዳዩ ንክልላዊ መንግስቲ የፍልጡ ከምዘለዉ ገሊጾም። ሓለፍቲ ዞባ ምዕራብ ጉጂ ኦሮሚያ ክሳብ ሕጂ ኣብቲ ጉዳይ ምላሽ ኣይሃቡን።