በአርሲ ሀገረ ስብከት በሺርካ ወረዳ ግድያ እና መፈናቀል መከሰቱ ተገለጸ

የአርሲ ሀገረ ስብከት በሺርካ ወረዳ ክርስቲያኖች እየተገደሉ እና ከቀዬአቸው እየተፈናቀሉ እንደሚገኙ አስታወቀ። በታጠቁ ሃይሎች እየተፈጸመ ያለው ጥቃት ከጊዜ ወደ ጊዜ እየተባባሰ መምጣቱን ሀገረ ስብከቱ ገልጿል። የሀገረ ስብከቱ ሊቀ ጳጳስ አቡነ ኤልሳዕ ችግሩን ለመፍታት ከመንግስት አካላት ጋር በተደጋጋሚ ውይይት ቢያደርጉም ዘላቂ መፍትሔ ማግኘት አልተቻለም።

ሀገረ ስብከቱ ለጉዳዩ ከሚመለከታቸው የመንግሥት አካላት እስከ ሰላም ሚኒስቴር ድረስ አሳውቆ ምላሽ እየጠበቀ ቢሆንም እስካሁን መፍትሔ አልተገኘም። በመሆኑም ቅዱስ ሲኖዶስ እና የመንግሥት አካላት የከፋውን የጸጥታ ችግር በመቆጣጠር ለችግሩ ፈጣን እልባት እንዲሰጡ ጠይቋል።