በአርሲ ዞን በደረሰ ጥቃት 60 ምዕመናን ተገደሉ - ቅዱስ ሲኖዶስ

የኢትዮጵያ ኦርቶዶክስ ተዋሕዶ ቤተክርስቲያን ቅዱስ ሲኖዶስ፣ በአርሲ ዞን መርቲና ሸርካ ወረዳዎች በደረሱ ጥቃቶች 60 ምዕመናን መገደላቸውን አሳወቀ። ጥቅምት 10 እና 14 ቀን በተፈጸሙት ጥቃቶች በመርቲ ወረዳ 14፣ በሸርካ ወረዳ ደግሞ 46 ሰዎች ተገድለዋል። በተጨማሪም 20 መኖሪያ ቤቶች ተቃጥለው ከ20 በላይ ሰዎች ከባድ ጉዳት ደርሶባቸዋል።

ቅዱስ ሲኖዶሱ ጥቃቱን በጽኑ ያወገዘ ሲሆን፣ መንግሥት የዜጎችን ደኅንነት እንዲያስከብርና አጥፊዎችን ለሕግ እንዲያቀርብ ጠይቋል። ቤተክርስቲያኗ ለተጎጂዎች የጸሎተ ፍትሐት ሥርዓት እንዲፈጸም ያዘዘች ሲሆን፣ ከመንግሥት ጋር በመወያየት ችግሩን በዘላቂነት ለመፍታት እንደምትሠራም ገልጻለች።