በጃናሞራ ወረዳ በረዶ ቀላቅሎ በጣለው ዝናብ ከ200 ሄክታር በላይ ሰብል ወደመ

በሰሜን ጎንደር ዞን ጃናሞራ ወረዳ በሳቅባ ቀበሌ አቁራ ተብሎ በሚጠራ አካባቢ በረዶ ቀላቅሎ የጣለው ዝናብ ከ200 ሄክታር በላይ የተዘራ ሰብል ላይ ጉዳት አስከትሏል። በዚህ የአየር ንብረት ክስተት የገብስ፣ የስንዴ፣ የባቄላ፣ የአተር እና የምስር ሰብሎች ከፍተኛ ጉዳት ደርሶባቸዋል።

ከጃናሞራ ወረዳ የተገኘው መረጃ እንደሚያመለክተው፣ 424 አርሶ አደሮች በዚህ የተፈጥሮ አደጋ ቀጥተኛ ተጎጂ ሆነዋል። በወረዳው ቀደም ሲል የኢሊኖ የአየር ንብረት ለውጥ ተፅዕኖ ተከስቶ እንደነበር የተጠቀሰ ሲሆን፣ አሁን የተከሰተው የቅዝቃዜና የበረዶ ዝናብ በምርት ዘመኑ ላይ ተጨማሪ ጫና ፈጥሯል።