በዋግ ኽምራ በድርቅ ምክንያት እናቶችና ህፃናት ለከባድ የምግብ እጥረት ተጋለጡ

በዋግ ኽምራ ዞን ሰሃላ ሰየምት ወረዳ በኤልኒኖ ምክንያት በተከሰተ የዝናብ እጥረት ነዋሪዎች ከባድ የምግብ እጥረት እየገጠማቸው ነው። የወረዳው ጤና ጽሕፈት ቤት መረጃ እንደሚያሳየው በ13 ቀበሌዎች በተደረገ ምርመራ ከ7,968 ህፃናት መካከል 4,350ዎቹ የተመጣጠነ ምግብ እጥረት አለባቸው፤ ከእነዚህ ውስጥ 300ዎቹ አስቸኳይ ድጋፍ ያስፈልጋቸዋል።

ከዚህ በተጨማሪ 1,818 ነፍሰጡርና አጥቢ እናቶች ተፈትሸው 1,672ቱ የተመጣጠነ ምግብ እጥረት እንዳለባቸው ታውቋል። ነዋሪዎች በተለይም እናቶችና ህፃናት ለከፋ አደጋ ተጋልጠው ስለሆነ መንግስትና ባለድርሻ አካላት አፋጣኝ ድጋፍ እንዲያደርጉ ጥሪ አቅርበዋል።