በደቡብ ወሎ ተፈናቃዮች መጠለያ ካምፕ የድሮን ጥቃት ተፈጸመ፤ 16 ሰዎች ተገድለዋል

በደቡብ ወሎ ዞን፣ ጃሪ ቁጥር 2 መጠለያ ካምፕ በነበሩ ተፈናቃዮች ላይ ጥቅምት 19/2019 ዓ/ም የድሮን ጥቃት ደረሰ። የካምፑ ኮሚቴ አባላት እንደገለጹት፣ በጥቃቱ 14 ሰዎች በቦታው ሲሞቱ፣ ለህክምና ወደ ደሴ የተላኩ 2 ሰዎች በሆስፒታል ህይወታቸው በማለፉ የሟቾች ቁጥር ወደ 16 ከፍ ብሏል። ከተጎጂዎች መካከል ህፃናት እንደሚገኙበት እና 29 ሰዎች እንደቆሰሉ ተገልጿል። ጥቃቱ የደረሰው ከኦሮሚያ ወለጋ ተፈናቅለው መጠለያ ፍለጋ በመጡ ሰዎች ላይ ነው። የካምፑ ነዋሪዎች ዛሬም በአካባቢው ተኩስ በመሰማቱ እና ድሮን በአካባቢው በመታየቷ መጠለያቸውን ለቀው ወደ ደሴ እና ሐይቅ ከተሞች መሸሻቸውን ተናግረዋል። እስካሁን ድረስ ምንም አይነት የመንግስት ድጋፍ እንዳልደረሳቸው እና ሁኔታው አስጊ እንደሆነ ገልጸዋል።