በአዲስ አበባ ሐሰተኛ ሰነዶችንና ገንዘብ ሲያዘጋጅ የነበረ ግለሰብ ተያዘ

የአዲስ አበባ ፖሊስ በለሚ ኩራ ክፍለ ከተማ ሐሰተኛ የትምህርት ማስረጃዎችን፣ መታወቂያዎችን፣ የመንጃ ፈቃዶችን እና የገንዘብ ኖቶችን ሲያዘጋጅ የነበረ ግርማ ንጉሴ የተባለ ግለሰብን መያዙን አስታወቀ። በፖሊስ በተካሄደ ፍተሻ በተጠርጣሪው መኖሪያ ቤት የተለያዩ የሐሰት ሰነዶች፣ ማህተሞች፣ ቴክኖሎጂ መሳሪያዎች እንዲሁም ቱርክ ሰራሽ ሽጉጥ እና 11 ጥይቶች ተገኝተዋል። ፖሊስ በጉዳዩ ላይ የምርመራ መዝገብ በማደራጀት ለአቃቤ ሕግ ለማቅረብ እየሰራ መሆኑን ገልጿል።

በመንግስት እና በግል ተቋማት ላይ የሐሰተኛ ሰነድ አጠቃቀም የሚያደርሰውን ጉዳት የጠቀሰው ፖሊስ፣ ተቋማት የተቀጣሪዎችን ሰነድ የመመርመር ስራቸውን አጠናክረው እንዲቀጥሉ አሳስቧል። ሐሰተኛ ሰነድ ማዘጋጀት እና መጠቀም በህግ የሚያስጠይቅ ወንጀል መሆኑን አክሎ ገልጿል።