ኣብ ኣዲስ ኣበባ ናይ ሓሶት ሰነዳትን ገንዘብን ከዳሉ ዝነበረ ውልቀሰብ ተታሒዙ

ፖሊስ ኣዲስ ኣበባ ኣብ ክፍለ ከተማ ለሚ ኩራ ናይ ሓሶት ናይ ትምህርቲ መረዳእታታት፣ መለለዪ ካርዲታት፣ ፍቓድ መዝወሪን ገንዘብን ከዳሉ ዝነበረ ግርማ ንጉሴ ዝተባህለ ውልቀሰብ ከምዝተታሕዘ ኣፍሊጡ። ፖሊስ ኣብ ዝገበሮ ፍተሻ ኣብ መንበሪ ገዛ እቲ ተጠርጣሪ ዝተፈላለዩ ናይ ሓሶት ሰነዳት፣ ማህተማት፣ መሳርሒታት ሕትመት፣ ላፕቶፕ፣ ናይ ሓሶት ባንክኖታትን (ብርን ዶላርን) ከምኡውን ሽጉጥን 11 ጥይትን ከምዝተረኽበ ገሊጹ። ፖሊስ ኣብቲ ጉዳይ ፋይል መርመራ ብምድላው ንኣቃቤ ሕግ ንምቕራብ ይሰርሕ ከምዘሎ ሓቢሩ።

ምጥቃም ናይ ሓሶት ሰነዳት ኣብ መንግስታዊን ውልቃዊን ትካላት ዘስዕቦ ጉድኣት ዝሓበረ ፖሊስ፣ ትካላት ሰነዳት ሰራሕተኛታቶም ንምጽራይ ዘለወን ጻዕሪ ከጠናኽራ ኣተሓሳሲቡ። ናይ ሓሶት ሰነድ ምድላውን ምጥቃምን ብሕጊ ዘሕትት ገበን ምዃኑ ኣዘኻኺሩ።