የቀድሞው ፕሬዚዳንት ሙላቱ ተሾመ ስለባሕር በር እና ቀጣናዊ ግንኙነት ተናገሩ

የቀድሞው ፕሬዚዳንት ሙላቱ ተሾመ (ዶ/ር) የኢትዮጵያ የባሕር በር ጥያቄ ታሪካዊ መብት እና የኢኮኖሚ ሕልውና ጉዳይ መሆኑን ገለጹ። ግብጽ ኢትዮጵያን ለማዳከም ታሪክን ተጠቅማ ኤርትራን በማገዝ የባሕር በር አልባ እንዳደረገች ያነሱት ዶ/ር ሙላቱ፣ አሁንም ከኤርትራ ጋር በመተባበር ኢትዮጵያን የማፍረስ አካሄድ እንደምትከተል ወቅሰዋል። ጠ/ሚ ዐቢይ አሕመድ ለኤርትራ የሰጡትን ማስጠንቀቂያ እንደሚደግፉ የገለጹት የቀድሞው ፕሬዚዳንት፣ ኤርትራ ጥፋቷን ካላቆመች ኢትዮጵያ ለህልውናዋ ስትል እርምጃ ለመውሰድ እንደምትገደድ ተናግረዋል። ኢትዮጵያ የባሕር በር ጥያቄዋን በሰላማዊ እና በዲፕሎማሲ መንገድ ለመፍታት እየሰራች መሆኑን ያረጋገጡት ሙላቱ፣ ዓለም አቀፍ ማኅበረሰቡ ለሽምግልና ሚናውን እንዲጫወት ጥሪ አቅርበዋል። ጉዳዩ በጊዜ ካልተፈታ በቀጣናው ያለው ግጭት እንደሚቀጥልም አስጠንቅቀዋል።