ጠቅላይ ሚኒስትር ዐቢይ አሕመድ የመንግሥት አመራሮች በሁርሶ ወታደራዊ ሥልጠና እየወሰዱ መሆኑን ገለጹ

ጠቅላይ ሚኒስትር ዐቢይ አሕመድ (ዶ/ር) የመንግሥት አመራሮች በሁርሶ ወታደራዊ ማሠልጠኛ ማዕከል ሥልጠና እየወሰዱ መሆኑን አስታውቀዋል። ጠቅላይ ሚኒስትሩ ሥልጠናው አመራሮቹ ዲሲፕሊንን፣ የጋራ ዓላማን በቅንጅት የማሳካት አቅምን፣ እንዲሁም ኃላፊነትንና ተጠያቂነትን እንዲያዳብሩ እንደሚረዳ አስረድተዋል። "የመደመር መንግሥት" አመራሮች የሀገርን ሁለንተናዊ ብልጽግና ለማረጋገጥ በዕውቀትና በአካል የዳበሩ፣ በሥነ ምግባር የታነፁ መሆን እንዳለባቸው ጠቅሰዋል። በተጨማሪም ሥልጠናው የመደመር ሥልጣኔ ስትራቴጂን ለማስፈጸምና የሀገርን ደኅንነት ለመጠበቅ የሚያስፈልጉ ክሂሎችን ለመገንባት ያለመ መሆኑን ገልጸዋል።