Preezdaant Putin fi Isaias Afewerqii Moskoo keessatti marii cufaa ta'e taasisan

Preezdaantii Eertiraa Isaias Afewerqii yaa'ii Raashiyaa-Afrikaa booda Moskoo turaniiru. Halkan kaleessaa preezdaant Vlaadimir Putin preezdaant Isaias waliin marii cufaa ta'e kan taasisan yoo ta'u, qabiyyee mariichaa ilaalchisee hanga ammaa odeeffannoon ifa ba'e hin jiru. Kanaan dura, yaa'ii ifaa irratti hoggantoonni kunneen damee anniisaa, teeknoolojii, maayinii fi qonna irratti mari'atanii turan. Gama biraatiin, ministirri geejjibaa Raashiyaa Dmitri Yaardov preezdaant Isaias waliin buufataalee bidiruu fi bu'uuraalee misooma geejjibaa ammayyeessuu irratti mari'ataniiru. Raashiyaan kanaan dura Itoophiyaa fi Eertiraa gidduutti mariin akka taasifamuuf deeggarsa akka gootu ibsuun ishee kan yaadatamu yoo ta'u, mariin cufaa ta'e kun waa'ee kanaa irratti kan xiyyeeffate ta'uu isaa ragaan mirkanaa'e hin jiru.