ፕረዚደንት ፑቲንን ኢሳያስ ኣፈወርቅን ኣብ ሞስኮ ብዕጹው ማዕጾ ተመያይጦም

ፕረዚደንት ኤርትራ ኢሳያስ ኣፈወርቂ ድሕሪ መዛዘሚ ዋዕላ ሩስያ-ኣፍሪካ ኣብ ሞስኮ ይርከቡ። ትማሊ ምሸት ፕረዚደንት ቭላድሚር ፑቲን ምስ ፕረዚደንት ኢሳያስ ብዕጹው ማዕጾ ተመያይጦም፣ እንተኾነ ግና ብዛዕባ ትሕዝቶ እቲ ዘተ ዝወጸ ወግዓዊ ሓበሬታ የለን። ቅድሚ እዚ ብዝነበረ ክፉት መድረኽ መሪሕነት ክልቲኣን ሃገራት ብዛዕባ ሓይሊ፣ ቴክኖሎጂ፣ ማዕድን፣ ሕርሻን ምግቢ ውሕስነትን ተመያይጦም ነይሮም። ብተወሳኺ ሚኒስተር መጓዓዝያ ሩስያ ዲሚትሪ ያርዶቭ ምስ ፕረዚደንት ኢሳያስ ኣብ ዘመናዊ መዓርፎ መራኽብን መሰረተ ልማት መጓዓዝያን ብዝምልከት ተመያይጦም፣ ሩስያ ድማ ኣብ ህንጸት ወደባትን ምኽሪ ቴክኒክን ክትሕግዝ ድልውቲ ምዃና ገሊጻ። ሩስያ ቅድሚ ሕጂ ኣብ መንጎ ኢትዮጵያን ኤርትራን ዘተ ንምክያድ ድልውቲ ምዃና ገሊጻ እንተነበረት፣ እቲ ዝተገበረ ዝርርብ ምስዚ ጉዳይ ዝተኣሳሰረ እንተኾይኑ ዝተረጋገጸ ነገር የለን።