Poolisiin Federaalaa miseensota EPRP irratti qorannoo dabalataa guyyaa 14 gaafate

Poolisiin Federaalaa miseensota EPRP shororkeessummaan shakkaman irratti qorannoo isaa xumuruuf guyyaa 14 dabalataa akka kennamuuf Mana Murtii Ol Aanaa Federaalaatti gaafate. Shakkamtoonni kunneen; obbo Yishaq Wolday, obbo Abebe Akaalu fi obbo Abera Nigus yoo ta'an, naannoo Itoophiyaa Kibbaa, Arba Minchiitti namoota 17 ajjeesuu fi qabeenya barbadeessuun shakkamu. Poolisiin qorannicha xumuruuf ragaalee elektirooniksii qorachuu, jecha ragootaa fudhachuu fi sochiilee baankii hordofuu akka barbaachisu ibse. Yakki kun walxaxaa fi humnoota alaa wajjin walitti dhufeenya kan qabu ta'uu poolisiin hubachiiseera. Manni murtichaa galmee qorannoo poolisii qoree murtii kennuuf boruuf beellama kenneera.