በ66 ዓመታቸው የ12ኛ ክፍል ፈተናን ያለፉት ቄስ ሰይፉ ተስፋይ

በሰለዋ ከተማ የአንበሳ ባንክ የጥበቃ ሠራተኛ የሆኑት የ66 ዓመቱ ቄስ ሰይፉ ተስፋይ፣ በዘንድሮው የ12ኛ ክፍል ብሔራዊ ፈተና 320 ነጥብ በማምጣት ወደ ዩኒቨርሲቲ ለመግባት የሚያስችል ውጤት አስመዝግበዋል። በትግራይ ክልል ከሚገኙ 29 ሺህ ተፈታኞች መካከል አንዱ የሆኑት ቄስ ሰይፉ፣ በአጠቃላይ ከማለፊያ ውጤት ካመጡ 3,146 ተፈታኞች ተርታ ተሰልፈዋል።

ድርጊታቸውን ተከትሎ የሚሰሩበት ባንክ የዩኒቨርሲቲ ትምህርታቸውን እስኪጨርሱ ድረስ ሙሉ ወጪያቸውን እንደሚሸፍን፣ ከዩኒቨርሲቲ እንደገቡ ወርሃዊ ደመወዛቸው ለቤተሰቦቻቸው እንዲከፈል እንደሚያደርግና ትምህርታቸውን ሲያጠናቅቁ በቋሚነት እንደሚቀጥራቸው አስታውቋል። የ6 ልጆች አባት የሆኑት ቄስ ሰይፉ፣ የትምህርት ጥማት ዕድሜ እንደማይጠይቅ በማሳየት በብዙዎች ዘንድ አድናቆትን አትርፈዋል።