ኣብ ዕድመ 66 ዓመት ፈተና 12 ክፍሊ ዝሓለፉ ቄስ ሰይፉ ተስፋይ

ኣብ ከተማ ሰለዋ ተወሳኺ ሓላው ንብረት ባንኪ ኣንበሳ ዝኾኑ ቄስ ሰይፉ ተስፋይ፣ ኣብዚ ዓመት እዚ ኣብ ዝተገበረ ፈተና 12 ክፍሊ 320 ነጥቢ ብምምጻእ ናብ ዩኒቨርሲቲ ንኽኣትዉ በቒዖም። ኣብ ክልል ትግራይ ካብ ዝተፈተኑ 29 ሽሕ ተማሃሮ ውሽጢ፣ ቄስ ሰይፉ ሓደ ካብቶም ዝሓለፉ 3,146 ተማሃሮ ኾይኖም ኣለው።

ነዚ ስዒቡ፣ እቲ ባንኪ ትምህርቶም ክሳብ ዝውድኡ ዘድሊ ወጻኢታት ሙሉእ ብምሉእ ከምዝሽፍን፣ ናብ ዩኒቨርሲቲ ምስ ኣተዉ እውን ወርሓዊ መሃዮኦም ንስድራቤቶም ከምዝለኣኽን፣ ትምህርቶም ምስ ወድኡ ድማ ብቀዋሚነት ከምዝቆጽሮም ኣፍሊጡ ኣሎ። ኣቦ 6 ደቅን ዝኾኑ ቄስ ሰይፉ፣ ትምህርቲ ዕድመ ከምዘይሓትት ብምሕባር ኣብ ብዙሓት ኣድናቆት ረኺቦም ኣለው።