የኢትዮጵያ ኤሌክትሪክ ኃይል ለኮይሻ ግድብ 400 ሚሊዮን ዩሮ ብድር እየደራደረ ነው

የኢትዮጵያ ኤሌክትሪክ ኃይል ከጣሊያን አበዳሪ ተቋማት ጋር 400 ሚሊዮን ዩሮ የንግድ ብድር ለመውሰድ እየተደራደረ መሆኑን አስታወቀ። ድርድሩ የተጀመረው የአለም የገንዘብ ድርጅት (IMF) ለኮይሻ ግድብ ፕሮጀክት ብቻ በልዩ ሁኔታ የንግድ ብድር እንዲወስድ ፈቃድ ከሰጠ በኋላ ነው። የኮይሻ ግድብ ግንባታ አሁን ላይ 77 በመቶ ደርሷል፤ ተቋሙ በ2019 በጀት ዓመት የግንባታውን አፈጻጸም ወደ 87 በመቶ ለማድረስ እና የግድቡን መዋቅር ሙሉ በሙሉ ለማጠናቀቅ አቅዷል። የፕሮጀክቱ ጠቅላላ ወጪ 3 ቢሊዮን ዩሮ እንደሚጠጋ የተገለጸ ሲሆን፣ ከጣሊያን የሚገኘው 400 ሚሊዮን ዩሮ የቀሪውን የግንባታ ሂደት ለማጠናቀቅ ይውላል። በፕሮጀክቱ ላይ ከፍተኛ የበጀት እጥረት መኖሩን የገለጹት የኢትዮጵያ ኤሌክትሪክ ኃይል ዋና ስራ አስፈፃሚ ኢ/ር አሸብር ባልቻ፣ የቀረውን የገንዘብ ክፍተት ተቋሙ በራሱ አቅም ለመሸፈን ማቀዱን ተናግረዋል።