በሰሜን ጎንደር ጃና ሞራ ወረዳ በድርቅ ምክንያት አስከፊ ሰብአዊ ቀውስ ተከሰተ

በሰሜን ጎንደር ዞን ጃና ሞራ ወረዳ በተከሰተ ድርቅ ከባድ የሰብአዊ ቀውስ ተፈጠረ። የዝናብ መዘግየትና እጥረት 18 ቀበሌዎችን በመጉዳቱ ከ96 ሺህ በላይ ሰዎች ለከፋ የምግብና የውሃ እጥረት ተዳርገዋል። በአካባቢው የተከሰተው ከፍተኛ የኑሮ ጫና ሰባት ወንዶች ራሳቸውን እንዲያጠፉ መግፋቱንና ከነዚህም ሁለቱ ህይወታቸው ማለፉ ተገልጿል። ከዚህ በተጨማሪም ከ5 ሺህ በላይ ህጻናት በተለያዩ ደረጃዎች የምግብ እጥረት የተጋለጡ ሲሆን፣ 4 ሺህ ነፍሰጡርና አጥቢ እናቶችም ለተመሳሳይ ችግር ተጋልጠዋል። ከ3 ሺህ በላይ እንስሳት በውሃና መኖ እጥረት መሞታቸው እንዲሁም የአባ ሰንጋ በሽታ መከሰቱ ስጋቱን አባብሶታል። የወረዳው ግብርና ጽህፈት ቤት አሁን ላይ ያለው ድጋፍ በቂ አለመሆኑን በመግለጽ፣ አፋጣኝ የምግብ፣ የመድሃኒትና የንጹህ ውሃ ድጋፍ እንዲደረግ ጥሪ አቅርቧል።