በጂቡቲ ወደብ ለ8 ወራት የታገቱ ከ4,500 በላይ ተሽከርካሪዎች

ከ4,500 በላይ የሆኑ የከባድ ጭነትና የሕዝብ ማመላለሻ ተሽከርካሪዎች የገንዘብ ሚኒስቴር ባወጣው የነዳጅ ተሽከርካሪ ክልከላ መመሪያ ምክንያት ከ8 ወራት በላይ በጂቡቲ ወደብ ተጣብቀዋል። ከ300 ሚሊዮን ዶላር በላይ ዋጋ ያላቸው እነዚህ ተሽከርካሪዎች በየቀኑ 90,000 ዶላር ዲሜሬጅ እያስከፈሉ ሲሆን፣ በከፍተኛ ሙቀትና ጨዋማ አየር ምክንያትም ጉዳት እየደረሰባቸው ነው።

አስመጪዎች ጉዳዩን እንዲፈቱላቸው ለጠቅላይ ሚኒስትር ዐቢይ አሕመድ አቤት ብለዋል። የጉምሩክ ኮሚሽንም ተሽከርካሪዎቹ በጉምሩክ ቁጥጥር ስር እንዲገቡ ለገንዘብ ሚኒስቴር ጥያቄ አቅርቦ የነበረ ቢሆንም ምላሽ አላገኘም። ነጋዴዎቹ ተሽከርካሪዎቹ በጨረታ የመሸጥ፣ ንብረታቸው በሐራጅ የመወረስ እና በብሔራዊ ባንክ ጥቁር መዝገብ ውስጥ የመመዝገብ ስጋት እንዳለባቸው በመግለጽ ፈጣን መፍትሄ ይሻሉ።