ኣብ ወደብ ጅቡቲ ን8 ኣዋርሕ ተታሒዞም ዘለዉ ልዕሊ 4,500 መካይን

ልዕሊ 4,500 ከባድ መካይንን ናይ ህዝቢ መጓዓዝያን፡ ሚኒስትሪ ፋይናንስ ብዘውጽኦ ትእዛዝ (ናይ ነዳዲ መካይን ክልከላ) ምኽንያት ንልዕሊ 8 ኣዋርሕ ኣብ ወደብ ጅቡቲ ተታሒዘን ይርከባ። ዋጋ እዘን መካይን ልዕሊ 300 ሚልዮን ዶላር ዝግመት ኮይኑ፡ ኣብ መዓልቲ 90,000 ዶላር ክፍሊት ደሜሬጅ ይሓታ ኣለዋ። ብተወሳኺ ብሰንኪ ጽዑቕ ሙቐትን ጨውን ጉድኣት ይወርደን ኣሎ።

እቶም ኣእተውቲ መካይን ናብ ቀዳማይ ሚኒስትር ዓቢይ ኣሕመድ መፍትሒ ንኽረኽቡ አቤቱታ ኣቕሪቦም ኣለዉ። ኮሚሽን ጉምሩክ እውን እተን መካይን ኣብ ትሕቲ ቁጽጽር ጉምሩክ ክኣትዋ ንሚኒስትሪ ፋይናንስ ሓቲቱ እኳ እንተነበረ፡ መልሲ ኣይረኸበን። እቶም ነጋዶ፡ እተን መካይን ብጨረታ ክሽያጣ፡ ንብረቶም ብጨረታ ክወረስ፡ ከምኡውን ኣብ ባንኪ ሃገር ብዝርዝር ጥቁር መዝገብ ክስፈሩ ከምዝኽእሉ ብምግላጽ ህጹጽ መፍትሒ ይጽውዑ ኣለዉ።