የአዲስ አበባ ገቢዎች ቢሮ በግብር ስወራ የተጠረጠሩ የመኪና አስመጪዎች ላይ ዕርምጃ ወሰደ

የአዲስ አበባ ገቢዎች ቢሮ ሕገ-ወጥ የግብር ስወራ የፈጸሙ የመኪና አስመጪዎች ላይ ዕርምጃ መውሰዱን አስታውቋል። ቢሮው እንዳለው፣ አስመጪዎቹ ተሽከርካሪዎችን በራሳቸው መሸጫ ቦታ ከመሸጥ ይልቅ፣ በኮሚሽን ኤጀንቶች በመጠቀም ሕግ ጥሰዋል። በምርመራ የተረጋገጠባቸው ድርጅቶችና ግለሰቦች ሱቆቻቸው ታሽገው ጊዜያዊ ፈቃድ እገዳ ተጥሎባቸዋል። በተጨማሪም አስመጪዎቹ ፈቃዳቸውን በመጠቀም ከሦስተኛ ወገን ተሽከርካሪ በመቀበል መሸጣቸው ተረጋግጧል። አዲሱ የተጨማሪ እሴት ታክስ አዋጅ ቁጥር 1341/2017፣ ንግድ በተፈቀደለት ቦታና ዘርፍ ብቻ መከናወን እንዳለበት ይደነግጋል። ቢሮው የኮሚሽን ኤጀንቶች ከአገለገሉ መኪኖች ውጪ አዲስ መኪና መሸጥ እንደማይችሉ አስጠንቅቋል።