በአዲስ አበባ የስጋ ዋጋ በኪሎ 1200 ብር እንዲሸጥ ተወሰነ

የአዲስ አበባ ከተማ ህብረት ስራ ኮሚሽን በከተማው የሚገኙ የህብረት ስራ ልኳንዳ ቤቶች አንድ ኪሎ ስጋን በ1,200 ብር እንዲሸጡ አዲስ የዋጋ ተመን ማውጣቱን አስታውቋል። ይህ ውሳኔ የተላለፈው ነባሩ የዋጋ ተመንና ከህብረተሰቡ የቀረቡ ቅሬታዎችን መሰረት በማድረግ ከ274 የሥጋ ቤት ባለቤቶች ጋር ከተደረገ ውይይትና ጥናት በኋላ ነው። ከተወሰነው ዋጋ በላይ የሚሸጡ አካላት ላይ ህጋዊ እርምጃ እንደሚወሰድ ኮሚሽኑ አስጠንቅቋል። በተጨማሪም የስጋ ቤቶች ከበሬ አቅራቢዎች ጋር ቀጥተኛ ትስስር እንዲፈጥሩ በማድረግ አቅርቦትን ለማረጋጋት እየተሰራ መሆኑንና እስካሁን 7,000 የሚጠጉ ትስስሮች መፈጠራቸውን ተገልጿል።