Waldhabdee Daangaa Naannoo Kibbaatti Ka'een Lubbuun Namootaa Dabrera, Namoonni 500 Buqqa'an

Naannoo Itoophiyaa Kibbaa daangaa gooliwwan Konsoo, Allee fi Omoo Kibbaa irratti waldhabdee ka'een lubbuun namoota baay'ee darbee, qabeenyi manca'ee namoonni hedduun qe'ee isaanii irraa buqqa'aniiru. Akka jiraattotni fi hoogganoonni naannichaa jedhanitti, waldhabdeen kun Paagumeen 4 irraa eegalee sababa beeyladoota jalaa badaniin gara Aanaa Kolmeetti namoonni hidhatan seenuun ka'e. Garuu guyyaa itti aanutti namoonni hidhatan kun miidhaa geessisuun manneen, kilinika, mana barumsaa, daakuu fi iddoo waaqeffannaa barbadeessaniiru. Bulchaan Aanaa Kolmee Obbo Fikruu Birhaanuu akka mirkaneessanitti namoonni 4 du'anii, 6 miidhamaniiru, akkasumas manneen 21 barbadaa'aniiru; jiraattotnis gama Konsootiin namoonni 6 du'uu ibsaniiru. Namoonni 500 ol ganda Kurgroo, Duraayil, Kisiimaa fi Tukaanaa irraa buqqa'aniiru, Laga Wayitoos harka namoota hidhatanii galee jira. Gama Aanaa Beenaa Tsamayitiin namoonni 2 du'anii 3 miidhamuun gabaasameera. Waraanni Raayyaa Ittisa Biyyaa tasgabbii deebisuuf jecha gara naannichatti bobba'ee jira.