የኮሬ ዞን ባለሥልጣን የምዕራብ ጉጂ ዞንን ክስ አስተባበሉ

የኮሬ ዞን የኮሚኒኬሽን ኃላፊ አቶ አሸብር ገዙ፣ የምዕራብ ጉጂ ዞን አመራር የኮሬን ዞን 'የኦነግ ሸኔ የሎጂስቲክስ ምንጭ' አድርገው የሰጡትን መግለጫ አጣጣሉ። አቶ አሸብር መረጃው ሀሰት መሆኑን ገልጸው፣ የኮሬ ሕዝብ በአካባቢው ሰላም ለማስፈን እየታገለ መሆኑን አስረድተዋል። የሁለቱ አካባቢዎች የጸጥታ መደፍረስ የጀመረው የመከላከያ ሠራዊት ወደ ሰሜን ከተንቀሳቀሰ በኋላ እንደሆነ ያብራሩት ኃላፊው፣ በጉጂ እና በኮሬ መካከል ያለው የታሪክና የደም ትስስር ጠንካራ መሆኑን አስታውሰዋል። የሁለቱ ክልሎች እና የፌደራል መንግሥት ለዘላቂ መፍትሔ በጋራ መሥራት እንዳለባቸው ጥሪ አቅርበዋል። የዞኑ አስተዳደር እየሞተ ላለው ሕዝብ ክብር እንዲሰጥና ጉዳዩ እንዲጣራ ጠይቀዋል።