Weellisaa Beekamaan Girmaa Nagash Umurii 83 Umrii Isaniitiin Addunyaa Kanarraa Du'aan Addaan Ba'an

Weellisaa beekamaa fi angafa Itoophiyaa Girmaa Nagash umurii isaanii 83ffaa irratti mana isaanii keessatti addunyaa kanarraa du'aan addaan ba'uu isaanii maatii isaanii wabeeffachuun Raadiyoon Sheger FM 102.1 gabaaseera. Artiistichi mana isaaniitti tajaajila narsootaatiin waldhaansa fayyaa argachaa osoo jiranii kaleessa galgala sa'aatii 1:00 irratti du'aan addaan ba'aniiru. Girmaa Nagash bara 1936 Finfinnee naannoo Fiit Berritti kan dhalatan yoo ta'u, Orkeestiraa Poolisii fi Tiyaatira Biyyoolessaa keessatti waggoota hedduudhaaf hojii muuzikaatiin tajaajilaniiru. Weellisaan kun sirboota beekamoo kanneen akka "Mnaw Tleyeshign", "Yene Hasab", "Engenagnalen", fi "Albeqagnm Gena" jedhaman dhiyeessuudhaan beekamu. Artiist Girmaa Nagash abbaa ilmaan dhiiraa 3 fi intala 1 kan turan yoo ta'u, sirni awwaalcha isaanii Katedraala Qulqulluu Sillaasee (Menbere Tsebaot) irratti kan raawwatamu ta'uu gabaasameera.