በአዲስ አበባ ቅጠል ተራ ዘመናዊ የመኖሪያ ቤቶች ተገንብተው ተላለፉ

የአዲስ አበባ ከተማ አስተዳደር በቅጠል ተራ አካባቢ 960 ዘመናዊ የመኖሪያ ቤቶችን በአራት ወራት ውስጥ ገንብቶ ለነዋሪዎች አስረክቧል። ከንቲባ አዳነች አቤቤ እንደገለጹት፣ ቀደም ሲል ለኑሮ ምቹ ያልነበረውና የእሳት አደጋዎች ይከሰቱበት የነበረው አካባቢ በአሁኑ ወቅት "የመርካቶ የበጎነት መንደር" ተብሎ ተሰይሟል። በ11 ሺህ ካሬ ሜትር ላይ የተገነቡት ዘጠኝ ባለ ስምንት ፎቅ (G+8) ብሎኮች፣ ከቤቶቹ በተጨማሪ 371 የንግድ ሱቆችን ያካተቱ ናቸው። መንደሩ የመኪና ማቆሚያ፣ የኤሌክትሪክ መኪና ቻርጅ ማድረጊያ፣ የስፖርት ማዘውተሪያዎች፣ የሕፃናት መጫወቻ ስፍራዎችና ዘመናዊ የፍሳሽና የኤሌክትሪክ መስመሮችን አሟልቷል። ይህ ፕሮጀክት በከተማዋ "ተራ" ተብለው የሚጠሩ ሌሎች አካባቢዎችንም ወደ ዘመናዊ የመኖሪያ መንደሮች የመቀየር ዕቅድ አካል መሆኑ ተገልጿል።