የጎንደር ኃይሌ ሆቴልና ሪዞርት ግንባታ ተጠናቆ በቅርቡ ወደ ሥራ ይገባል

በአማራ ክልል ጎንደር ከተማ እየተገነባ የሚገኘው የኃይሌ ሆቴልና ሪዞርት ግንባታ መጠናቀቁን የግሩፑ ማኔጅንግ ዳይሬክተር አቶ ጋዲሳ ግርማ አስታወቁ። ሆቴሉ ከሁለት እስከ ሦስት ወራት ባለው ጊዜ ውስጥ አገልግሎት መስጠት እንደሚጀምር የተገለጸ ሲሆን፣ ይህ የኃይሌ ሆቴልና ሪዞርት 12ኛው መዳረሻ ይሆናል። ባለአራት ኮከብ ሆቴሉ 84 ክፍሎች ያሉት ሲሆን፣ ግንባታው የፋሲለደስን ባህላዊ አርክቴክቸር ተከትሎ የተሰራ ነው። አቶ ጋዲሳ የኮንስትራክሽን እቃዎች ዋጋ መናርን ጨምሮ አንዳንድ ፈተናዎች ቢኖሩም ግንባታውን በተሳካ ሁኔታ ለማጠናቀቅ መቻሉን ገልጸዋል። ሆቴሉ ሲከፈት በኪራይ ይሰራ የነበረው ቅርንጫፍ አገልገሎቱን እንደሚቀጥልም ታውቋል።