Pirezidaantiin naannoo Sidaamaa haaraan, Dr. Masay Hayiluu eenyu?

Dr. Masay Hayiluu bakka Obbo Dastaa Laddaamoo bu’uun Pirezidaantii naannoo Sidaamaa ta’anii muudamaniiru. Pirezidaantiin haaraan kun kanaan dura itti gaafatamaa waajjira fayyaa godina Sidaamaa fi itti aanaa pirezidaantii Yuunivarsitii Hawaasaa ta’anii tajaajilaniiru. Muummee fayyaa ummataatiin digirii lammaffaa, akkasumas Eepidiyoomooloojiidhaan yuunivarsitii Noorweey Bergantii irraa digirii PhD qabu. Dabalataanis, daayreektara olaanaa Inistiitiyuutii Fayyaa Hawaasaa Itoophiyaa (EPHI) ta’anii hojjetaniiru.

Dr. Masay miseensa gorsaa teeknikaa kan Afrikaa CDC fi miseensa boordii Akaadaamii Saayinsii Itoophiyaa fi Abbaa Taayitaa Antii-Doopingii Itoophiyaa turaniiru. Miseensa komitee hojii raawwachiiftuu Ministeera Fayyaa ta’uudhaan imaammata fayyaa biyyaalessaa irratti hirmaataniiru. Muudamni isaanii muuxannoo fi dandeettii hoji gaggeessummaa isaan kanaan dura qaban irratti hundaa’uun kan murtaa’e ta’uun ibsameera.