ሓዲሽ ፕሬዚደንት ክልል ሲዳማ ዶ/ር መሳይ ሃይሉ መን እዮም?

ዶ/ር መሳይ ሃይሉ ንኣቶ ደስታ ሌዳሞ ተኪኦም ፕሬዚደንት ክልል ሲዳማ ኮይኖም ተሸይሞም። እቲ ሓዲሽ ፕሬዚደንት ቅድሚ ሕጂ ሓላፊ ክፍሊ ጥዕና ዞባ ሲዳማን ምክትል ፕሬዚደንት ዩኒቨርሲቲ ሃዋሳን ኮይኖም ኣገልጊሎም እዮም። ኣብ ዓውዲ ጥዕና ዶክትሬት ዘለዎም ክኾኑ ከለዉ፡ ዋና ዳይሬክተር ትካል ጥዕና ህዝቢ ኢትዮጵያ (EPHI) ኮይኖም እውን ሰሪሖም እዮም። ብተወሳኺ ኣባል ቤት ምኽሪ ቴክኒክን ኣማኻርን ማእከል ቁጽጽር ሕማማት ኣፍሪቃ (Africa CDC) ነይሮም እዮም። ከም ኣባል ኮሚተ ፈጻሚ ስራሕ ሚኒስትሪ ጥዕና ድማ ኣብ ብሄራዊ ፖሊስታት ጥዕና ተሳቲፎም እዮም።

ዶ/ር መሳይ ኣብ ላዕለዎት ትካላት ትምህርትን ኣብ ፈደራል ደረጃን ንነዊሕ ዓመታት ዝጸንሑ ተመክሮ ዘለዎም መራሒ ከምዝኾኑ ተገሊጹ። ኣባል ቦርድ ኣካዳሚ ሳይንስ ኢትዮጵያን ኣካል ፀረ-ዶፒንግ ኢትዮጵያን ኮይኖም እውን ኣገልጊሎም እዮም። ብቕዓት መሪሕነቶምን ሞያዊ ተመክሮኦምን ንነበርቲ ክልል ንኽምርሑ ከምዘብቅዖም ተፈሊጡ ኣሎ።