አምነስቲ ኢንተርናሽናል ኣብ ሰሜን ኢትዮጵያ ኲናት ብምስፍሐፉ ህጹጽ ኣኼባ ሕብረት ኣፍሪቃ ክጽዋዕ ሓቲቱ

አምነስቲ ኢንተርናሽናል ባይቶ ሰላምን ጸጥታን ሕብረት ኣፍሪቃ ብዛዕባ ኩነታት ኢትዮጵያ ህጹጽ ኣኼባ ክጽውዕ ሕቶ ኣቕሪቡ። እዚ ሕቶ እዚ ዝቐረበ ኣብ ክልል ትግራይ ከምኡ እውን ኣብ ገለ ኣካላት ክልላት ዓፋርን ኣምሓራን ሓዲሱ ዝተራእየ ኲናት ብምስፍሐፉን ብምስጣኑን እዩ። እቲ ናይ ሰብኣዊ መሰላት ትካል ኣብ ልዕሊ ሰቪላውያን ዘንጸላልው ዘሎ ሓደጋ ብምልዓሉን ኣህጉራዊ ሕግታት ክጣሓስ ይኽእል እዩ ብምባል ኣጠንቂቑ። ኣብቲ ብሓሙስ ዘውጽኦ መግለጺ፡ ብምኽንያት ናይ መድፍዕ ደብዳብን ናይ ኣየር መጥቃዕቲታትን ኣብ ልዕሊ ሰቪላዊ ንብረታት ጉዳኣት ምብጽሑ ዘርእዩ ኣመንንቲ ጸብጻባት ከም ዝበጽሕዎ ገሊጹ። ብተወሳኺ እቲ ጸብጻብ ብግደታ ምምልማል ወታሃደራትን ካልኦት ኣህጉራዊ ሰብኣውን ሰብኣዊ መሰላትን ሕግታት ዝጣሕሱ ተግባራት ከም ዝበዝሑ ኣመልኪቱ። እቲ ትካል ንሰቪላውያን ካብ ተወሳኺ ሓደጋ ንምክልኻል ህጹጽ ዲፕሎማሲያዊ ስጉምቲ ክውሰድ ኣተሓሳሲቡ።