ብጉጅ 'ትብብር ንህልውና' ምስ መንግስቲ ዘካይዶ ቃልሲ ከምዝቕጽል ገሊጹ

ከሸዓተ ፖለቲካዊን ዕጥቃዊን ጉጅለታት ዝቖመ 'ትብብር ንህልውና'፡ ምስ መንግስቲ ዝገብሮ ቃልሲ ከምዝቕጽል ዳግማይ ኣፍሊጡ። እቲ ጉጅለ ንፈደራል መንግስቲ 'ናይ ሓባር ጸላኢ' ክብል ዝሰየሞ ኮይኑ፡ መንግስቲ ዘላቒ ሰላም ናይ ምምጻእን ሕጊ ናይ ምኽባርን ዓቕሚ ከምዘይብሉ ኣብ ዘሰራጨዎ መግለጺ ገሊጹ። እዚ መግለጺ ዝወጸ፡ ኢታማዦር ሹም ሰራዊት ምክልኻል ኢትዮጵያ ፊልድ ማርሻል ብርሃኑ ጁላ ነቲ ጉጅለ ብሰራዊት ምክልኻል ከምዝሰዓርዎ ካብ ዝገልጹሉ ሒደት መዓልታት ዝጸንሐ እዩ። በቲ ካልእ ወገን፡ ውድብ ጥዕና ዓለም (WHO) ኣብ ክልል ኣምሓራን ትግራይን ኣብ ልዕሊ ሲቪላት እናወረደ ኣብ ዘሎ መጥቃዕቲ፡ ብፍላይ ድማ ብድሮን ኣብ ዝግበር መጥቃዕቲ፡ ዓቢይ ስክፍታ ከምዘለዎ ገሊጹ። እቲ ውድብ ንሰላም ቅድምያ ክወሃቦ ጸዊዑ። ገምገምቲ ፖለቲካ እዚ መግለጺ እዚ፡ ወታደራዊን ፖለቲካዊን መርገጺ ናይቲ ጉጅለ ናብ ሓደ መስመር ከምዝመጸ ዘመላኽት እዩ ይብሉ።