ኣብ ኣዲስ ኣበባ ብርቱዕ ሓደጋ ምፍንዳሕ ከም ዝተሰምዐ ተገሊጹ

ኣብ ኣዲስ ኣበባ ኣብ እተፈላለዩ ኣካባቢታት ዝነበሩ ነበርትን ዲፕሎማሲያውያን ምንጭታትን ረቡዕ ፍረቓ ለይቲ ድሕሪ ሰዓት 6:20 ብርቱዕ ምፍንዳሕ ምስማዖም ገሊፆም። እቲ ምፍንዳሕ ኣብ ከባቢታት ጎተራን ቤተልን ብዝበለፀ ዝተሰምዐ እንተኾኑ፡ ህንፃታት ዘንቀጥቀጥን ናይ መኪና ኣላርም ዘስምዐን ከምዝነበረ ተገሊፁ። እዚ ፍፅፀምዚ ዝሰምዐ ሃገራዊ ናይ ሓበሬታን ደህንነትን ኣገልግሎት (NISS) ኣብ ኣዲስ ኣበባ ብዘይ ፍቓድ ዝበሩ ድሮናት ከምዝተሓዝኡን ስጉምቲ ከምዝወደቖምን ካብ ዘፍልጥ ድሕሪ ውሑድ መዓልታት እዩ። ቢቢሲ ካብ ቤት ፅሕፈት ጠቅላይ ሚኒስተር፣ ካብ ሚኒስትሪ ምክልኻልን ካብ ፖሊስን መልሲ ንምርካብ ዝገበሮ ፈተነ ኣይተዓወተን። እቲ ምፍንዳሕ ኣብ ሰሜን ኢትዮጵያ ሓደሽቲ ውግኣት ኣብ ዝተላዕሉሉን ሓይልታት ተቓወምቲ ናይ ድሮን ዓቕሚ ኣለዎም ኣብ ዝበሃለሉ ዘሎ እዋን ዝተፈፀመ እዩ።