ጠቅላይ ሚኒስትር አብይ ስለኑክሌር ኃይል ማመንጫ ግንባታ ዝርዝር መግለጫ ሰጡ

ጠቅላይ ሚኒስትር አብይ አህመድ ለኑክሌር ኃይል ማመንጫ ግንባታ ከ30 በላይ ቦታዎች ተለይተው እንደነበርና አሁን ወደ ሶስት እንደተቀነሱ አስታወቁ። የኢትዮጵያ የኑክሌር ኃይል ኮሚሽንን የጎበኙት ጠቅላይ ሚኒስትሩ፣ ፕሮጀክቱ ረጅም ጊዜ የሚወስድና ለኢትዮጵያ ስልታዊ ልማት ወሳኝ መሆኑን ገልጸዋል። የኑክሌር ቴክኖሎጂ ለጤና፣ ለግብርና፣ ለኢንዱስትሪ እና ለሌሎች ልማቶች ከፍተኛ አስተዋጽኦ ይኖረዋል።

ኢትዮጵያ እያንዳንዳቸው 1,200 ሜጋ ዋት የሚያመነጩ ሁለት የኑክሌር ኃይል ማመንጫ ክፍሎችን ለመገንባት አቅዳለች። አጠቃላይ 2,400 ሜጋ ዋት የሚያመነጨው ይህ ፕሮጀክት በዓመት ሙሉ የተረጋጋ ኃይል እንደሚሰጥ እና ከታላቁ የኢትዮጵያ ህዳሴ ግድብ በኃይል አቅርቦት መረጋጋት እንደሚበልጥ ታምኖበታል። የፕሮጀክቱ ግንባታ እጅግ ፈጣን ቢባል እንኳን እስከ አስር ዓመት ሊወስድ እንደሚችል ጠቅላይ ሚኒስትሩ ጠቁመዋል።