ሱዳን ኢትዮጵያን በድሮን ጥቃት ተባባሪነት በድጋሚ ከሰሰች

የሱዳን መንግስት በሀገሪቱ የኤሌክትሪክ መሰረተ ልማቶች፣ የነዳጅ ማከማቻዎች እና የሲቪል ተቋማት ላይ የተፈፀመው የድሮን ጥቃት ከኢትዮጵያ ድንበር የመነጨ ነው ሲል በድጋሚ ከሰሰ። የሱዳን የውጭ ጉዳይ ሚኒስቴር ምክትል ሚኒስትር ሙዓዊያ ዑስማን ካሊድ እንዳሉት፣ ጥቃቶቹ በካርቱም፣ በአል-ጀዚራ፣ በናይል አባይ፣ በሲናር እና በአል-ቃዳሪፍ ክልሎች የተፈጸሙ ሲሆን፣ የሱዳን የመከላከያና የደህንነት ተቋማት ካቀረቡት ማስረጃ መረዳት እንደሚቻለው ድሮኖቹ ከኢትዮጵያ ድንበር የተነሱ ናቸው።

ባለሥልጣኑ ኢትዮጵያና የተባበሩት አረብ ኤሚሬቶች (UAE) ለጥቃቱ ተባባሪ ናቸው ሲሉ የከሰሱ ሲሆን፣ ሱዳን ራሷን የመከላከል መብት እንዳላት አስታውቀዋል። ይህ በእንዲህ እንዳለ፣ የኢትዮጵያ መንግስት ከዚህ ቀደም በተመሳሳይ ሁኔታ ሲቀርብበት የነበረውን መሰል ክስ "መሰረት የለሽ" በማለት ውድቅ ማድረጉ ይታወሳል። የኢትዮጵያ የውጭ ጉዳይ ሚኒስቴር በግንቦት ወር እንደገለጸው፣ የሁለቱን ሀገራት ህዝቦች የቆየ ግንኙነት ለመጠበቅ ሲባል በሱዳን ጦርነት ምክንያት በኢትዮጵያ ድንበር አካባቢ የሚፈጠሩትን ግጭቶች በዝምታ እንደሚያልፍ ገልጾ ነበር።