ሱዳን ብጉዳይ መጥቃዕቲ ድሮን ንኢትዮጵያ ከሲሳ

መንግስቲ ሱዳን ኣብቲ ሃገር ኣብ ዝርከቡ መሰረተ ልማታት ሓይሊ ኤሌክትሪክ፡ መኽዘን ነዳዲን ትካላት ሲቪልን ዝተፈጸመ መጥቃዕቲ ድሮን ካብ ዶብ ኢትዮጵያ ዝተበገሰ ምዃኑ ደጊሙ ከሲሱ። ምክትል ሚኒስትር ጉዳያት ወጻኢ ሱዳን ሙዓዊያ ዑስማን ካሊድ ከም ዝበልዎ፡ እቲ መጥቃዕቲ ኣብ ካርቱም፡ ኣል-ጀዚራ፡ ሰማያዊ ናይል፡ ሲናርን ኣል-ቃዳሪፍን ዝተፈጸመ ኮይኑ፡ ናይ ሱዳን ትካላት ጸጥታ ኣብ ዘቕረብዎ መርትዖ መሰረት እቶም ድሮናት ካብ ዶብ ኢትዮጵያ ዝተበገሱ ምዃኖም ኣመልኪቶም።

እቲ በዓል ስልጣን ኢትዮጵያን ሕቡራት ኢማራት ዓረብን (UAE) ኣብቲ መጥቃዕቲ ኢድ ከም ዘለዎም ክሲ ኣቕሪቦም፡ ሱዳን ርእሳ ናይ ምክልኻል መሰል ከም ዘለዋ ድማ ኣፍሊጦም። በቲ ካልእ ወገን፡ መንግስቲ ኢትዮጵያ ቅድሚ ሕጂ ብተመሳሳሊ ኩነታት ዝቐርበሉ ዝነበረ ክሲ "መሰረት ዘይብሉ" ብምባል ነጺግዎ። ሚኒስቴር ጉዳያት ወጻኢ ኢትዮጵያ ኣብ ወርሒ ግንቦት ከም ዝገለጾ፡ ናይ ክልቲኤን ሃገራት ህዝብታት ንነዊሕ እዋን ዝጸንሐ ዝምድና ንምሕላው ክብል፡ ብሰንኪ ውግእ ሱዳን ኣብ ዶብ ኢትዮጵያ ዝፍጠሩ ግጭታት ብህድኣት ከም ዝሓልፎ ገሊጹ ነይሩ።