Walitti bu'iinsi Mooyyalee itti fufee jira; namoonni 50,000 baqatanii Keeniyaa galaniiru

Walitti bu'iinsa naannoo Oromiyaafi Somaalee gidduu magaalaa Mooyyalee keessatti uumameen namoonni 50,000 ta'an baqatanii daangaa Keeniyaatti ce'uu Dhaabbanni Biyyoota Gamtoomanii beeksiseera. Komaandarri poolisii Keeniyaa Joorji Kipkooroos akka ibsanitti, dhukaansi Itoophiyaa irraa dhukaafame daangaa darbee Keeniyaatti akka bu'eefi qaamoti nageenyaa Keeniyaa daangaa irratti bobbaafamuusaanii ibsaniiru. Mootummaan Federaalaa Itoophiyaa ta'e mootummoonni naannoo lamaan hanga ammaatti dhimma kana irratti waanti jedhan hin jiru.

Walitti bu'iinsi kun kan eegale alaabaan naannoo Somaalee dhaabamuun walqabatee dubartiin tokko ajjeefamtee booda akka ta'e jiraattonni dubbatu. Kantiibaan Mooyyalee gama Oromiyaa fi Somaalee himannaa waliif dhiyeessaa jiru. Kuni immoo walitti bu'iinsa bara darbe naannoon Somaalee aanolee 14 haaraa hundeessee naannoo Oromiyaa keessatti mormii kaase waliin kan walqabatu akka ta'e ibsameera.